Հերթական խոշտանգման դեպքը (Տեսանյութ)

Արմեն Մարտիրոսյանը մեղադրվում է Կարեն Կարապետյանի և Պետրոս Հակոբյանի հետ 2009թ կատարած մի շարք ավազակային հարձակումների մեջ: Արմեն Մարտիրոսյանին ձերբակալել են 2010 հունվարի 19ին: Նրան մեղադրանք է առաջադրվել ՀՀ քր. օր-ի 175 հոդվածի 3-րդ մասի 1-ին և 2-րդ կետերի, 235 հոդվածի 3-րդ մաս և 236 հոդվածի 3-րդ մասով, այն բանի համար, որ նա ավազակություններ կատարելու դիտավորությամբ 2009թ. նոյեմբերին իր հորաքրոջ որդի, Երևան քաղաքի բնակիչ Կարեն Կարապետյանի առաջարկով ներգրավվել է կազմակերպված կայուն խմբի կազմում, պլանավորել են հանցագործությունների կատարումը, Կ.Կարապետյանը Ա. Մարտիրոսյանին տրամադրել է զենք` գազային ատրճանակ, որի գործադրմամբ վերջինս 2009թ. նոյեմբերի 30-ին, ապօրինի մուտք գործելով, առանձնապես խոշոր չափերով գույք հափշտակելու նպատակով, կյանքի և առողջության համար վտանգավոր բռնություն գործադրելու սպառնալիքներ տալով ավազակություն է կատարել Երևան քաղաքի Կուրղինյան փողոցի 3 շենքի 44 բնակարանի բնակիչների /ամուսիններ Արսեն Լալայանցի և Ելենա Վարդազարյանի/ նկատմամբ: Դրանից հետո, կազմակերպված հանցավոր խմբի կազմում Կ. Կարապետյանը ընդգրկել է նաև Արմեն Մարտիրոսյանի ընկերոջը` Պետրոս Մնացականի Հակոբյանին, որի հետ կազմակերպված խմբով ապօրինի կերպով ձեռք է բերել, պատրաստել և պահել հրազեն հանդիսացող կարճեցված փողով հրացան: Դրա և գազային ատրճանակի գործադրմամբ (2009 թ. դեկտեմբերի 12-ին /Սամվել Սուրենի Շահգալդյանին պատկանող` Երևան քաղաքի Դավիթաշեն Ձոր-1 թաղամասի 89 տուն/, դեկտեմբերի 26-ին /ամուսիններ Մանվել Բադալյանի և Երազիկ Ալեքսանյանին պատկանող` Երևան քաղաքի Լենինգրադյան փողոցի 31/26 տուն/ և  2010թ. հունվարի 16-ին / “Արայ” ՍՊ ընկերության սեփականատեր Արմեն Արայի Պետրոսյանին պատկանող` Երևան քաղաքի Փափազյան փողոցի 2-րդ նրբանցքի 101 տուն/) Կ Կարապետյանի ղեկավարմամբ Ա. Մարտիրոսյանը և Պ. Հակոբյանը  ապօրինի մուտք գործելով առանձնապես խոշոր չափերի գույք հափշտակելու նպատակով, կյանքի և առողջության համար վտանգավոր բռնություն գործադրելով և սպառնալիքներ տալով ավազակություններ են կատարել Երևան քաղաքում գտնվող ևս երեք բնակիչների նկատմամբ:  Արմեն Մարտիրոսյանի մայրը` Օֆելյա Մարտիրոսյանը, դիմել է Հելսինկյան ասոցիացիա և հայտնել է իր որդու նկատմամբ կատարված խոշտանգումների մասին: Նա հայտնել է, որ իր որդու ցուցմունքները կորզվել են խոշտանգումների միջոցով: Մոր խոսքերով՝ ոստիկանները գիշերը ժամը մեկից հետո, քաղաքացիական հագուստով, մոտ 10-15 հոգով առանց դուռը ծեծելու և ներկայանալու մտել են իրենց տուն և սկսել խուզարկել բնակարանը: Արմեն Մարտիրոսյանին ձերբակալել են այն ժամանակ երբ նա գտնվում էր Գյումրիում և, համաձայն մոր խոսքերի, ամբողջ ճանապարհը՝ Գյումրիից Երևանի Արաբկիր համայնքի ոստիկանական բաժանմունք, նրան ենթարկել են ծեծի և խոշտանգումների: Դրանից 2-3 օր հետո Արմեն Մարտիրոսյանին (անչափահաս) տեղափոխել են մանկական գաղութ, որտեղ և մայրը տեսել է իր որդու մարմնի վրա առկա կապտուկները: Մայրը հայտնեց, որ որդու երիկամները մոտ երկու ամիս արունահոսում էին: Արմեն Մարտիրոսյանը հայտնել է, որ խոշտանգումների ժամանակ նա շատ է վատացել և նրան տարել են պատուհանի մոտ ու ասել, որ իրեն պատուհանից  դուրս կնետեն: Խոշտանգումներից փրկվելու համար Արմեն Մարտիրոսյանը գաղութում ինքնասպանության փորձ է կատարել՝ կտրելով երակները: Հելսինկյան ասոցիացիան տեղեկություններ ունի նաև մյուս մեղադրյալների նկատմամբ կատարված խոշտանգումների մասին, սակայն ստույգ տվյալներ դեռևս չենք կարող ներկայացնել:

Արմեն Մարտիրոսյանի գործով դատավարությունը սկսվել է 2010թ. օգոստոսին: Դատավարությունը ընթացքի մեջ է: Հաջորդ դատական նիստը նշանակված է 2011թ. օգոստոսի 29-ին, ժամը՝ 15:00-ին, Արաբկիր վարչական շրջանի ընդհանուր իրավասության դատարանում:

  • Տեղադրված .
  • Դիտումներ: 2981
0
0
0
s2sdefault
logoUSAIDlogo23logo

“Սույն վեբ-կայքի ստեղծումը հնարավոր է դարձել իրականացնել Քաունթերփարթ ինթերնեշնլի հայաստանյան ներկայացուցչության կողմից իրականացվող Քաղաքացիական հասարակության և տեղական ինքնակառավարման աջակցության ծրագրի,  և Ամերիկայի Միացյալ Նահանգների բնակչության առատաձեռն աջակցության շնորհիվ` ԱՄՆ Միջազգային զարգացման գործակալության պայմանագրի շրջանակներում “Հելսինկյան Ասոցիացիայի” միջոցով: Սույնի բովանդակությունը, արտահայտված տեսակետերը և կարծիքները պատկանում են հեղինակին` “Հելսինկյան Ասոցիացիային” և հնարավոր է, որ չհամընկնեն Քաունթերփարթ ինթերնեշնլի հայաստանյան ներկայացուցչության, ԱՄՆ Միջազգային զարգացման գործակալության և ԱՄՆ կառավարության տեսակետերի հետ:”

Designed by Hakob Jaghatspanyan Copyright © 2013 Helsinki Association