Գերմանիայի հյուպատոսարանը համագործակցում է ՀՀ իշխանությունների հետ, կարծում է իրավապաշտպանը

MikaԳերմանիայի հյուպատոսարանը համագործակցում է ՀՀ իշխանությունների հետ: Epress.am-ի հետ զրույցում նման կարծիք է հայտնել իրավապաշտպան Միքայել Դանիելյանը:


Դանիելյանի խոսքով՝ իր այս տեսակետն ապացուցվել է վերջերս, երբ հյուպատոսարանը չի ցանկացել իրեն մուտքի արտոնագիր տրամադրել՝ մեկնելու Բրյուսել՝ Եվրամիության և Եվրախորհրդարանի ներկայացուցիչների հետ հանդիպմանը մասնակցելու համար:

 

 

Հոկտեմբերի 29-ին կայանալիք հանդիպմանը հրավիրված Դանիելյանին և «Սոցիոսկոպ» ՀԿ-ի նախագահ Էվելինա Գյուլխանդանյանին վիզա տրամադրելու համար հյուպատոսարանին դիմել էին Human Rights House միջազգային կազմակերպությունից, սակայն վիզայի հարցը հյուպատոսարանում ձգձգել են, նոր փաստաթղթեր պահանջել, անգամ Դանիելյանի քրոջ անձնագիրը:

Իրավապաշտպաններին թույլ չեն տվել հանդիպել հյուպատոսի հետ, ի վերջո, վիզա տրվել է՝ ընդամենը 4 օրով:

«Ես համոզված եմ, որ հյուպատոսը ճանաչում է ինձ: Նախկին դեսպանը իմ հիվանդասենյակում է անցկացրել մի օր, երբ ինձ վրա կրակել էին: Ավելին՝ իրենց գրել են հենց կազմակերպիչները և ասել՝ ինչ միջոցառման համար ենք մենք գնում Բրյուսել: Հարցը դա չէ, այլ այն, թե էդ ինչ չէին ուզում, որ մենք պատմենք ԵԽ և ԵՄ ներակայացուցիչներին Հայաստանում տիրող իրավիճակի մասին», – ասել է Միքայել Դանիելյանը:

Ըստ իրավապաշտպանի՝ Գերմանիայի դեսպանատան և իշխանությունների համագործակցության մասին վկայող այլ դեպքեր ևս եղել են: Մասնավորապես, իշխանության կողմից ստեղծված, հայտնի միջազգային կազմակերպության անունը կրող Human Rights House հայաստանյան կազմակերպությունն առաջին դրամաշնորհը ստացել է հենց Գերմանիայի դեսպանատնից: Իրավապաշտպանի խոսքով՝ նույն դեսպանատունը հրաժարվում էր մուտքի վիզա տրամադրել իրական Human Rights House-ի հայաստանյան ներկայացուցչության նախագահ Միքայել Դանիելյանին:

Իրավապաշտպանը նաև հիշեցրել է, որ, ԵՄ-ի որոշմամբ, իրավապաշտպանների համար մուտքի արտոնագիր ստանալու կարգը դյուրացված և արագացված պետք է լինի, ինչպես նաև հավելել, որ, օրինակ, Վրաստանի, Ռուսաստանի,Մոլդովայի և Ուկրաինայի իրավապաշտպանները շենգենյան գոտու մուտքի արտոնագրերը անվճար են ստանում:
Epress.am-ին խնդրի առնչությամբ հարցում է կատարել Գերմանիայի դեսպանություն, սակայն դեռևս պատասխան չի ստացել:

Տեղեկատվությունը` Epress.am-ի:

 

  • Տեղադրված .
  • Դիտումներ: 1703
0
0
0
s2sdefault
logoUSAIDlogo23logo

“Սույն վեբ-կայքի ստեղծումը հնարավոր է դարձել իրականացնել Քաունթերփարթ ինթերնեշնլի հայաստանյան ներկայացուցչության կողմից իրականացվող Քաղաքացիական հասարակության և տեղական ինքնակառավարման աջակցության ծրագրի,  և Ամերիկայի Միացյալ Նահանգների բնակչության առատաձեռն աջակցության շնորհիվ` ԱՄՆ Միջազգային զարգացման գործակալության պայմանագրի շրջանակներում “Հելսինկյան Ասոցիացիայի” միջոցով: Սույնի բովանդակությունը, արտահայտված տեսակետերը և կարծիքները պատկանում են հեղինակին` “Հելսինկյան Ասոցիացիային” և հնարավոր է, որ չհամընկնեն Քաունթերփարթ ինթերնեշնլի հայաստանյան ներկայացուցչության, ԱՄՆ Միջազգային զարգացման գործակալության և ԱՄՆ կառավարության տեսակետերի հետ:”

Designed by Hakob Jaghatspanyan Copyright © 2013 Helsinki Association