Փաստաբանների հետապնդումներ

143.jpg

Իրանում կանանց և աղջիկներին թույլատրված չէ դուրս գալիս տնից, եթե նրանք չեն ծածկում իրենց մազերը գլխաշորով և իրենց ձեռքերն ու ոտքերը՝ ազատ հագուստով։ Իրանում հիջաբ կրելու պարտադիր լինելու դեմ շարժումը սկսվել է 2017թ․-ին, երբ մի կին միայնակ դիմադրության գործողություն իրականացրեց։ Նա հանեց իր գլխաշորը և, ամրացնելով փայտի ծայրին, լուռ թափահարեց այն։ Բազմաթիվ կանայք ամբողջ երկրով մեկ միացան նրան՝ կազմակերպելով բողոքի ակցիաներ։ Նրանք հայտնի դարձան որպես «Հեղափոխական փողոցի աղջիկներ»։

Իրավապաշտպանը բանտարկվել է

2018թ․-ին Նասրինը պաշտպանել է այս կանանցից մի քանիսին, ովքեր ենթարկվել են դատական հետապնդման։ Այժմ երկու խիստ անարդար դատավարությունների արդյունքում Նասրինը դատապարտվել է 38 տարվա ազատազրկման և մտրակի 148 հարվածի՝ մեկուսացված ամուսնուց և երեխաներից։ Կանայք պետք է կարողանան ընտրել, թե ինչ հագուստ կրեն, և իրավաբանները պետք է կարողանան պաշտպանել այդ անելու նրանց իրավունքը։ Սա վերջին տարիներին Իրանում իրավապաշտպանի դեմ արձանագրված ամենասարսափելի դատավճիռն է, որը ենթադրում է, որ իշխանություններն ուժեղացնում են իրենց ճնշումները:

Օգնե՛ք ազատել Նասրինին

Սա առաջին անգամը չէ, որ Նասրինը թիրախավորվում է։ 2010թ․-ին նա դատապարտվել էր վեց տարվա ազատազրկման իրավապաշտպան գործունեության համար։ Բայց երբ Ձեզ նման հազարավոր մարդիկ ոտքի կանգնեցին և պահանջեցին նրա ազատությունը, նա արդարացվեց և ազատ արձակվեց։ Արշավն աշխատեց այն ժամանակ, այն այժմ կարող է կրկին աշխատել Նասրինի համար։

Նասրինն իր կյանքը նվիրել է մարդու իրավունքների պաշտպանությանը։

Կարող եք միանալ արշավին անցնելով հետևյալ հղումով։

Նյութի աղբյուրը՝ Amnesty International UK:

  • Տեղադրված .
  • Դիտումներ: 57
0
0
0
s2sdefault
142.jpg

ՀՀ փաստաբանների պալատի  ներկայացուցիչ Գեւորգ Մկրտչյանը, նախքան իր կարծիքը դատական նիստի ընթացքում տեսանկարահանման մասին հայտնելը, ցանկացավ ճշտել, թե ո՞վ է  տեսանկարահանում անցկացնելու։ Պարզելով, որ «Հելսինկյան ասոցիացիա» իրավապաշտպան հասարակական կազմակերպության նկարահանող խումբն է, առարկեց․ «Առարկում եմ։ Ծանոթ եմ իրենց գործելաոճին, եւ տեսանյութը կարող է յուրովի մեկնաբանվել»,- ասաց Գեւորգ Մկրտչյանը։

Հայցվոր Արայիկ Պապիկյանը Պալատի ներկայացուցչի պատճառաբանությունը չփաստարկված եւ հիմնազուրկ որակեց։

Այսօր դատարանում Արայիկ Պապիկյանը վիճարկում էր Փաստաբանների պալատի նախագահի 10.08.2017թ. թիվ 233-Ա/ԿԳ-17068 և Խորհրդի 05.04.2018թ. թիվ ԿԳ/65-Ա որոշումները։

Դատավոր Դիանա Հովհաննիսյանը  պարզաբանեց, որ  դատական նիստի տեսանյութի բացակայությունը կարող է դատական նիստն այլ կերպ մեկնաբանելու և ներկայացնելու տեղիք տալ, և ընդհակառակը,  տեսանկարահանման եւ նկարահանման դեպքում շատ ավելի հեշտ է խուսափել հնարավոր «յուրովի» մեկնաբանություններից։  

Իր խոսքում նշելով, որ  աշխատում է «Հելսինկյան ասոցիացիա»-ում, Արայիկ Պապիկյանը տեղեկացրեց, որ կազմակերպությունն իրականացնում է ինչպես իր, այնպես էլ այլ փաստաբանների նմանատիպ գործերով դատական նիստերի մշտադիտարկում և տեսանկարահանում դատարաններում։  

Այնուամենայնիվ, Փաստաբանների պալատի ներկայացուցիչը պնդեց իր կարծիքը, և դատավորը, հղում անելով «Քաղաքացիական դատավարության» օրենսգրքին եւ պատասխանող կողմի առարկությանը, ստիպված եղավ արգելել տեսանկարահանում անցկացնելը։

Այս գործով դատական նիստը հետաձգվեց, քանի որ հայցվոր կողմի մոտ հայցի հիմքի փոփոխության անհրաժեշտություն կա։  Դատական նիստը հետաձգվեց մինչեւ ապրիլի 16-ը։

Նույն հիմքով հետաձգվեց նաեւ Փաստաբանների պալատի նախագահի 15.09.2017թ. թիվ 295-Ա/ԿԳ-17111 և խորհրդի 15.03.2018թ. թիվ ԿԳ/51-Ա որոշումներն անվավեր ճանաչելու պահանջի մասին նիստը։

   Պատասխանող կողմի ներկայացուցիչ Գեւորգ Մկրտչյանը առարկեց նաև այս գործով տեսանկարահանման դեմ։  Վերջինս պատճառաբանեց, որ Արայիկ Պապիկյանը «Հելսինկյան ասոցիացիա»-ի աշխատակից է, եւ որ ինքը մտավախություն ունի, որ նիստի ընթացքը կարող է յուրովի մեկնաբանվել։

   Մկրտչյանն առարկեց, մասնավորապես նշելով․«Հարգելի՛ դատարան, դժվար չէ հատվածական մեջբերումներ անել»։ Նա  առաջարկեց մերժել ներկայացված միջնորդությունը։

Արայիկ Պապիկյանը միջնորդեց նախնական դատական նիստը հետաձգել, քանի որ հայցի հիմքում լրացման կարիք կա՝ առանց առարկան փոփոխելու։

Պատասխանող կողմը՝ Գեւորգ Մկրտչյանը, առարկեց միջնորդության դեմ՝ պատճառանաբանելով, որ հայցվոր կողմը բավարար ժամանակ ուներ դրան անդրադառնալու համար։

Դատավոր Դիանա Հովհաննիսյանը պատճառաբանեց, որ եթե կողմը նման միջնորդություն է ներկայացնում, մինչ ապացուցման բեռի բաշխումը, ապա նախագահողը պարտավոր է դատական նիստը հետաձգել։

Հաջորդ նիստի օր նշանակվեց ապրիլի 16-ին։  

   Հ․Գ.
Ի գիտություն ՀՀ փաստաբանների պալատի ներկայացուցիչ Գեւորգ Մկրտչյանի, տեղեկացնում ենք, որ «Հելսինկյան ասոցիացիա»-ի կայքէջում մշտադիտարկման առարկա դատական նիստերի նկարահանումների տեսահոլովակները տեղադրվում են ամբողջությամբ՝ գրեթե առանց մոնտաժի, լիովին պահպանելով բովանդակային մասը։

Համոզվելու համար կարող եք համեմատել «Հելսինկյան ասոցիացիա»-ի www.hrtv.am կայքէջում տեղադրված՝ Պալատի խորհրդի ցանկացած նիստի տեսահոլովակ Խորհրդի համապատասխան նիստի ձայնագրության հետ։ 

Իսկ որպեսզի խուսափեիք Փաստաբանների խորհրդի նիստերի, ըստ Ձեզ, «յուրովի մեկնաբանություններից», կարելի է թույլատրել, օրինակ, դրանք անցկացնել հանրության համար բաց, հասանելի, առանց արհեստական խոչընդոտների, ինչպես դա արվում էր նախկինում։

  • Տեղադրված .
  • Դիտումներ: 1124
0
0
0
s2sdefault
140.jpg

  «Վանաձոր» ՔԿՀ պետը Փաստաբանների պալատից խնդրում է պատասխանատվության ենթարկել  փաստաբան Արայիկ Պապիկյանին զուտ նրա համար, որ վերջինս պահանջել է անհապաղ կատարել դատարանի որոշումը։  

Փետրվարի 27-ին Վերաքննիչ քրեական դատարանը որոշում էր կայացրել իր պաշտպանյալին անհապաղ ազատ արձակելու մասին։ Դատարանից  որոշումը պաշտպանը ուղարկել է  «Վանաձոր» ՔԿՀ, որը մի քանի ժամ չէր կատարվել։

   «Զանգահարեցի «Վանաձոր» ՔԿՀ։ Որպես բողոք նաեւ բավականին կոշտ արտահայտություններով պահանջեցի, որ պաշտպանյալիս անհապաղ ազատ արձակեն, որովհետեւ կար  դատարանի անհապաղ ազատ արձակելու մասին որոշում»,- ասաց Արայիկ Պապիկյանը։

«Վանաձոր» ՔԿՀ պետ Արտակ Հովհաննիսյանը Փաստաբանների պալատ ուղարկված գրության մեջ մեջբերումներ է արել  Արայիկ Պապիկյանի հեռախոսազրույցից։ Նա նշել է, որ  բոլոր նրանք, ովքեր դատարանի որոշումը չեն կատարում, պետք է պատասխանատվության ենթարկվեն։ Պաշտպանը տվել է Արդարադատության նախարար Արտակ Զեյնալյանի, Քրեակատարողական ծառայության պետի, Քրեակատարողական հիմնարկի պետի անունները։

«Ըստ էության, ոչ կոռեկտ եմ ինձ պահել։ Հիմա ցանկանում եմ տեղեկացնել, որ ես բավականին  մեղմ եմ դրանք ասել։ Ես վերահաստատում եմ այդ ամենը, որ բոլոր անձինք, ովքեր դատարանի որոշումը չեն կատարում,  պետք է պատասխանատվության ենթարկվեն»,- նշում է փաստաբանը։ Նա նաև  ավելացնում է․ «Եթե Վանաձոր» ՔԿՀ պետը տեղյակ չէ ՔՕ 353-րդ հոդվածից, ապա ժամանակն է նրան հիշեցնել , որ սեւով սպիտակի վրա նշված է՝ դատական ակտը դիտավորությամբ չկատարելը, որում նշված է կատարման ժամկետ, քրեորեն պատժելի արարք է»։

«Վանաձոր» ՔԿՀ պետը  Փաստաբանների պալատի նախագահին  խնդրել է  է գրությունը ընդունել որպես հաղորդում եւ քննարկել Արայիկ Պապիկյանի նկատմամբ կարգապահական վարույթ հարուցելու նպատակահարմարությունը։

 «Եթե  ես, իր կարծիքով,  էթիկայի կանոններ եմ խախտել, ապա նպատակահարմարության հարց չի քննարկվում։ Սա հայեցողական տիրույթ չպետք է լիներ։ Այսինքն՝ ինքն անգամ կասկածում է՝ Արայիկ Պապիկյանը ինչ-որ բան խախտե՞լ է, թե՝ ոչ»,- ասում է փաստաբանը։

 Արայիկ Պապիկյանն առաջարկում է ՔԿՀ պետի  իրավական գիտելիքները ստուգման ենթարկել Արդարադատության նախարար Արտակ Զեյնալյանի կողմից։

 Իսկ եթե հեռախոսազրույցն էլ ձայնագրվել է, որի մասին  Արայիկ Պապիկյանին տեղյակ չի պահվել, ապա ձայնագրություն կատարող անձը՝ Հայկ Կաչյանը,   թույլ է տվել օրենքի խախտում։

   ՔԿՀ աշխատակիցը  պետք  է պատասխանի՝ ձայնագրե՞լ են հեռախոսազրույցը,  թե ուղղակի խոսակցությունից մեջբերումներ արել։ Արայիկ Պապիկյանը վստահեցնում է՝ իր խոսքերը խեղաթյուրել են։

 «Նշել են՝ փաստաբանը հորդորել է կալանավորված անձի հարազատներին ՔԿՀ հիմնարկ չներկայացնել  որոշման պատճենը։ Սա ուղղակի ֆանտաստիկ երեւակայություն ունեցող անձը կարող է նման գործողություններ թույլ տալ»։ Այս ամենը, ըստ պաշտպանի, վկայում է այն մասին, որ պաշտոնյաների կողմից  ՔԿՀ-ներում  շարունակում են տիրել այն բարքերը, որոնք եղել են Սերժ Սարգսյանի, Ռոբերտ Քոչարյանի օրոք, եւ փոփոխություներ դեռ չեն երեւում։

 Այլ մանրամասների կարող եք ծանոթանալ տեսանյութում։

  • Տեղադրված .
  • Դիտումներ: 222
0
0
0
s2sdefault
135.jpg

Փաստաբանների նկատմամբ մասսայական հետապնդումներն սկսվեցին 2016թ․ հուլիսի 17-ին ոստիկանության ՊՊԾ գնդի գրավման դեպքերով հարուցված քրեական գործով պաշտպանությունը ստանձնելու պահից։  

Դատարաններն անհարգալից վերաբերմունքի համար սանկցիայի էին ենթարկում փաստաբաններին, այնուհետեւ Փաստաբանների պալատը  համատարած կարգապահական պատասխանատվության էր ենթարկում նրանց։

Դրա   վառ ապացույցը Փաստաբանների պալատի խորհրդի կողմից  2017թվականին 86 վարույթի հարուցումն էր, որոնցից միայն 69-ը՝ «Սասնա ծռեր»-ի գործով։ Իսկ   2018թ․ տվյալները դեռ առկա չեն:

Փաստաբանների մուտքը դահլիճ խոչընդոտվում էր նաեւ կարգադրիչների կողմից, իսկ  Ֆեյսբուք սոցիալական ցանցում փաստաբան Արայիկ Պապիկյանի, ինչպես նաեւ ընտանիքի անդամների հասցեին սպառնալիքներ էին  հնչեցվում։ Սպառնալիքներ հնչեցնող անձն էլ մինչ օրս չի բացահայտվել։

Աղմկահարույց գործերով պաշտպանություն ստանձնած փաստաբանների  հետապնդումների  մասին եւս մեկ անգամ բարձրաձայնվեց    «Փաստաբանների իրավունքների ջատագովություն Հայաստանում» թեմայով կլոր-սեղան հանդիպում-քննարկման ժամանակ։   «Հելսիկյան ասոցիացիա»-ն Ժողովրդավարության եվրոպական հիմնադրամի (EED) հետ իրականացնում է Հայաստանում փաստաբանների իրավունքների ջատագովության ծրագիր։ Ծրագրի շրջանակներում անդրադարձ  է կատարվել 17-ից ավելի փաստաբանների գործունեությանը, ավելի քան 55 գործի մշտադիտարկում է իրականացվել, որոնցում ներգրավված էին հետապնդումների ենթարկված փաստաբաններ։ Ծրագրի շրջանակներում  մշտադիտարկվել են նաև Պալատի խորհրդի կարգապահական նիստերը եւ հարցազրույցներ են անցկացվել հետապնդումների ենթարկվող փաստաբանների և հանրային պաշտապանների հետ ոլորտին վերաբերվող տարբեր թեմաների շուրջ։

«Փաստաբանների իրավունքների ջատագովություն» թեմայով կլոր-սեղան հանդիպում-քննարկման ժամանակ աղմկահարույց գործերով փաստաբան Արայիկ Պապիկյանը նշեց՝ անկախ այն ամենից, թե ինչ պայմաններում են  փաստաբանները ենթարկվել դատական սանկցիաների, պալատի պատճառաբանության մեջ շաբլոնային ձեւակերպում է տրվում․ «Վերլուծելով վերը նշվածը՝ փաստաբանը հստակ գիտակցել է իր գործողությունների ոչ իրավաչափ լինելը,  եւ թույլ է տվել փաստաբանի վարքագծի էթիկայի կանոնների խախտում, հետեւաբար նրա նկատմամբ պետք է կիրառել պատասխանատվության հետեւյալ միջոցը»։  

 Մինչդեռ փաստաբանները հստակ նշել են, որ իրենք հանդես են եկել պարզապես ի շահ իրենց պաշտպանյալների, վերջիններիս համար արդար դատավարություն ապահովելու, ինչպես նաև փաստաբանական համայնքի  բարձր հեղինակությունը պաշտպանելու  համար։ «Պալատի գրությունից ստացվում է, որ փաստաբանները գիտակցել են, որ խախտում են կատարում,  եւ թույլ են տվել այդ խախտումը»,- ասում է Արայիկ Պապիկյանը:

Փաստաբանների պալատի խորհրդի որոշումների հետ համաձայն չլինելով՝  փաստաբանների մեծ մասը  դրանք վիճարկում են դատարանում։ Բայց այստեղ եւս փակուղային իրավիճակ է ստեղծել։

«Դատարանը, քննելով փաստաբանի բողոքը, ըստ էության պետք է ճանաչի,  որ մեկ այլ դատավոր փաստաբանի նկատմամբ սխալ որոշում է կայացրել: Հաշվի առնելով մեր դատական համակարգը եւ դատավորների ով լինելը՝ կարող է կասկած հարուցվել»,- ավելացնում է երկու տասնյակից ավելի կարգապահական պատասխանատվության ենթարկված Արայիկ Պապիկյանը: Նաև, նրա խոսքերով՝ փաստաբաններին չպետք է նույնացնել իրենց պաշտպանյալների հետ։

Կլոր սեղանի ժամանակ կարծիքներ հնչեցին, որ փաստաբանների հանդեպ հարուցված կարգապահական վարույթները պետք է կարճվեն, քանի որ դրանք նախորդ իշխանության պատվերով էին հարուցվել։

Ներկա փաստաբաններն իրենց կարծիքները հայտնեցին 2019թ․ հունվարի 1-ից ուժի մեջ մտած օրենքի դեմ, ըստ որի փաստաբանը դատարանի նկատմամբ անհարգալից վերաբերմունքի համար կարող է  մինչեւ 100 հազար դրամ տուգանքի ենթարկվել։

«Ամենամեծ փաստարկներից մեկն այն է, որ դատավորն ինքը վիրավորվում է, ինքը որոշում է կայացնում եւ ինքն էլ պատժում է։ Փաստաբանն  իր ուղիղ պարտականությունները կատարելու համար կարող է տուգանվել»,- ասում է «Հելսինկյան ասոցիացիա» ՀԿ նախագահ, փաստաբան Նինա Կարապետյանցը:

Փաստաբան Արայիկ Պապիկյանն էլ ընդգծում է՝  եթե փաստաբանը վճարի այդ գումարը եւ չբողոքարկի, նշանակում է, որ անհարգալից է եղել։ Դրանից հետո  Փաստաբանների պալատը պետք է կարգապահական վարույթ հարուցի եւ, պարզելով, որ փաստաբանը դատարանում էթիկայի կանոն է խախտել, եւս մեկ անգամ նկատողության է արժանացնելու: «Այսինքն՝ իմ մեկ խախտման համար ես երկու անգամ պատժվում եմ: Մինչդեռ հիմնարար սկզբունք  է մեկ  արարքի համար երկու անգամ չդատապարտվելը»։

«Հելսինկյան ասոցիացիա» իրավապաշտպան հասարակական կազմակերպությունը դեռ 2019թ․ փետրվարի 4-ին  դիմել է ԱԺ նախագահին  եւ պատգամավորներին՝ այդ թվում խորհրդարանում հայտնված փաստաբաններին՝ առաջարկելով փաստաբանների մասով օրենքը վերացնել կամ  խմբագրել այնպես, որ չտարածվի նրանց  վրա։ Մինչ օրս պատասխան չի ստացվել: Ըստ Նինա Կարապետյանցի՝ ներկայիս իշխանությունը  կարող է այդ օրենքը փոխել, քանի որ ունի բավարար ձայներ: «Համոզվելու համար, որ հեղափոխության արդյունքում քայլեր են արվում, պետք է այդ օրենքը վերացվի»,- հավելեց փաստաբան Հայարփի Սարգսյանը։

Հնչեցին առաջարկներ, որոնք կամփոփվեն և կներկայացվեն հաջորդ նախատեսվող կլոր-սեղան հանդիպման ժամանակ։

  • Տեղադրված .
  • Դիտումներ: 97
0
0
0
s2sdefault
134.png

2019թ մարտի 7-ին տեղի կունենա «Հելսինկյան ասոցիացիա» իրավապաշտպան հասարակական կազմակերպության կողմից իրականացվող «Փաստաբանների իրավունքների պաշտպանությունը» թեմայով կլորսեղան հանդիպում-քննարկում։

Քննարկման նպատակն է բացահայտել փաստաբանական/իրավապաշտպան գործունեությանն առնչվող օրենսդրական դաշտի առկա թերությունները, որոնք իրապես խոչընդոտում են ոլորտի դերակատարների ակտիվ ու արդյունավետ գործունեությանը, այն տարբեր հետպնդումներն ու ճնշումները, որոնց նրանք ենթարկվում են իրենց մասնագիտական պարտականնությունների իրականացման ընթացքում, ինչպես նաև առաջարկել խնդրի լուծմանն ուղղված հնարավոր անհրաժեշտ քայլեր և օրենսդրական փոփոխություններ՝ հետագա լրամշակման և ՀՀ Կառավարությանն առաջարկելու նպատակով։

Կլորսեղան հանդիպումը տեղի կունենա «Անի պլազա» հյուրանոցի «Գառնի» սրահում (ք․Երևան, Սայաթ-Նովա, 19), ժամը 1800 - 2000-ին։

Օրակարգում՝  հետհայացք ոլորտին առնչվող իրադարձություններին նախորդ երկու տարիների ընթացքում, փաստաբանների գործունեությանն առնչվող օրենսդրական դաշտում առկա խնդիրների ներկայացում, լուծումների առաջարկում։ 

  • Տեղադրված .
  • Դիտումներ: 76
0
0
0
s2sdefault
logoUSAIDlogo23logo

“Սույն վեբ-կայքի ստեղծումը հնարավոր է դարձել իրականացնել Քաունթերփարթ ինթերնեշնլի հայաստանյան ներկայացուցչության կողմից իրականացվող Քաղաքացիական հասարակության և տեղական ինքնակառավարման աջակցության ծրագրի,  և Ամերիկայի Միացյալ Նահանգների բնակչության առատաձեռն աջակցության շնորհիվ` ԱՄՆ Միջազգային զարգացման գործակալության պայմանագրի շրջանակներում “Հելսինկյան Ասոցիացիայի” միջոցով: Սույնի բովանդակությունը, արտահայտված տեսակետերը և կարծիքները պատկանում են հեղինակին` “Հելսինկյան Ասոցիացիային” և հնարավոր է, որ չհամընկնեն Քաունթերփարթ ինթերնեշնլի հայաստանյան ներկայացուցչության, ԱՄՆ Միջազգային զարգացման գործակալության և ԱՄՆ կառավարության տեսակետերի հետ:”

Designed by Hakob Jaghatspanyan Copyright © 2013 Helsinki Association