2022 թվականի ապրիլի 1-ից «Հելսինկյան ասոցիացիա» իրավապաշտպան հասարակական կազմակերպությունը նախաձեռնում է «Հայաստանում անկախ և թափանցիկ դատական համակարգ ունենալու ճանապարհին» ծրագիրը։ Այն նպատակաուղղված է դատական կառույցների գործունեության վերաբերյալ տեղեկատվության հասանելիության բարձրացմանը դատական մշտադիտարկման բարելավված մեխանիզմի ու արդյունքների վերաբերյալ նոր զեկույցի միջոցով, որը կներառի դատական համակարգի գործունեության 2021-2022 թվականների համեմատական վերլուծություն և բարեփոխումներին ուղղված նոր առաջարկներ։ Ըստ էության, ծրագիրը նախորդ՝ Լեհաստանի համերաշխության հիմնադրամի համագործակցությամբ իրականացված «Իրավական ոլորտում վերապատրաստված երիտասարդ քաղաքացիները որպես անկախ ու թափանցիկ դատական համակարգի երաշխավորներ» ծրագրի տրամաբանական շարունակությունն է։ Ծրագիրը կիրականացվի ՀՀ-ի Երևան, Գյումրի և Վանաձոր քաղաքներում,  որտեղ գործում են դատական մշտադիտարկողների մշտական խմբեր։ Հասարակական կազմակերպության փորձառու մշտադիտարկողների աջակցությամբ ու անմիջական ղեկավարությամբ խմբերում ընդգրկված երիտասարդները կշարունակեն զարգացնել իրենց գիտելիքն ու փորձը ոլորտում՝ քրեական գործերով դատավարություններ դիտարկելու նպատակով տեղի դատարաններ այցելությունների, արդյունքների շուրջ աշխատանքային քննարկումների և ոլորտի մասնագետների (ՀՀ ԱՆ ներկայացուցիչներ, դատավորներ, դատախազներ, փաստաբաններ, այլք) հետ փորձի փոխանակման հանդիպումների միջոցով։ Ծրագրի ավարտին կհրապարակվի զեկույց, որում տեղ գտած 2021-2022 թվականների համեմատական վերլուծությունն ու բարեփոխումներին ուղղված նոր առաջարկները կներկայացվեն ինչպես ոլորտի դերակատարներին և շահագրգիռ կողմերին, այնպես էլ հասարակության լայն խավերին։ Ծրագիրն իրականացվում է Լեհաստանի Հանրապետության արտաքին գործերի նախարարության Լեհաստանի զարգացման համագործակցության համաֆինանսավորմամբ և Լեհաստանի համերաշխության հիմնադրամի համագործակցությամբ։  

Վերաքննիչ քրեական դատարանն այսօր հաստատեց’ Արմեն Աղաջանյանի նկատմամբ «Նուբարաշեն» ՔԿՀ-ում խոշտանգում է տեղի ունեցել։ Խոշտանգման ենթարկելու գործով մեղադրանք էր առաջադրված «Նուբարաշեն» ՔԿՀ-ի հերթապահ խմբի առաջին կարգի մասնագետ Արմեն Հովհաննիսյանին։ Դատարանը նրան դատապարտեց յոթ տարի վեց ամսվա ազատազրկման։ Դատավճիռն օրինական ուժի մեջ մտնելուց հետո Արմեն Հովհաննիսյանը կհայտնվի անազատության մեջ։ Ըստ մեղադրանքի’ Արմեն Հովհաննիսյանը 2018թ․ մարտի 16-ին «Նուբարաշեն»-ում կատարած արարքի համար պատժելու նպատակով մի խումբ անձանց կազմում խոշտանգել է Արմեն Աղաջանյանին՝ վերջինիս պատճառելով ֆիզիկական ուժեղ ցավ, ինչից հետո մի խումբ պաշտոնատար անձանց հետ կատարել է պաշտոնեական կեղծիք։ Դատաքննությունից հետո Երեւան քաղաքի ընդհանուր իրավասության դատարանի դատավոր Դավիթ Բալայանը խոշտանգման հոդվածը վերաորակել էր որպես լիազորությունների անցում եւ դատարանի դահլիճից համաներմամբ ազատ արձակել։ Իսկ ահա Վերաքննիչ դատարանը մերժել էր թե դատախազի, եւ թե տուժողի իրավահաջորդի ներկայացուցիչ, «Հելսինկյան ասոցիացիա» ՀԿ փաստաբան Արա Ղարագյոզյանի բողոքները։ Գործով վճռաբեկ բողոք էր ներկայացվել։ Վճռաբեկ դատարանը գտել էր Արմեն Հովհաննիսյանի արարքը վերաորակելու վերաբերյալ ստորադաս դատարանների հետևությունները հիմնավոր չեն։ Վճռաբեկ դատարանը որոշել է գործն ուղարկել Վերաքննիչ դատարան՝ նոր քննության։ Հիշեցնենք, որ 30-ամյա Արմեն Աղաջանյանը կալանավորվելուց եւ «Նուբարաշեն» ՔԿՀ տեղափոխվելուց հետո ենթարկվել էր խոշտանգման, իսկ չորս ամիս հետո նրա մարմինը գտել էին կախված «Հոգեկան առողջության պահպանման ազգային կենտրոնի» լոգարանում։ Արմեն Աղաջանյանին խոշտանգելու փաստով մեկ գործ ևս գտնվում է Երեւան քաղաքի ընդհանուր իրավասության դատարանում։ Գործը քննվում է դատավոր Արտուշ Գաբրելյանի վարույթում։ Ամբաստանյալը Արտուշ Միրաքյանն է։